pusok so manparparok

abugak so linak na tungtungan
nen walay kimmiriring, biglaan
inmalis kan ag balot amatanir
inkalesa na busel na labilabir
tan angkekelanting iran elek
susutilen daak "singaak telek"

kunwari inaro agko inbelbeleng
matak walad dalin agmakaseleng
diyad pagew ko balet agmakareen
singa sapsapigerey bulong na ermen
mabetbet inaro so sungap koy dagem
aabageyen koy dilik, makapasinagem

kamamantaan alinggis kon nitan kala
walay bitbita supot,karga agko anta
say imis mo singa dosas ed kabuasan
mabusbuskag, no silew manlangalang
sineleng moray matak kalaktip lakap
alikas koy pusok manparparok, mantipak

akinet agmo imbagad siyak

manonton dalan
(akatandagak ed bintanan
iibegan koy santing daray
kaliberliber nen limmesayan
anlong)

liwawad bukig unkakamayat
pinabusel toy ligligad luyag
kansiyon iran masaysayaksak
iiliwen toy maar-aron lakap
mitimiti ran bibil, abitlabitlan
ngaran, akalukip er pankaindan
sulming er pagew manlangalang

nantupag ya dakulap nalmo toy aping
sinuroy toy buek, insalar tod dingding
emel ya pansibsibek amalsay ermen
paterter lay luwan abayag lan benben
“agaylay ruksam inaro” naiyebkas
tan andukey iran tungtung, marmarlas
pinaksot na katok er puwertan lukas
batika immabet, amina erme’y apunas

sikay limer

manonton dalan

limer er sika, sikay tangkay
toyan maletletey ya bilay
limer er sika, sikay ilalo
toyan maar-aron puso
limer er sika
inaro taka

diyar panakar na agew
limer kan akalaktip er pagew
ya mipaparukan, migagantil
napnuay liga lawasa sutil
balet masarag lay im-imis
mon punasen toy nangnangis

sikay inarok
manandod pusok
simsimpitan kon iya-amot
ta agkon balot labaya napultot
sikay limer ya tangkay toyan bilay
tan sikay limer ya ilalo toyan puso

pusok; sikay nanpiyaan

manonton dalan

walay kugip kon masansanting
naliliknak ed maaron aping
samay im-imis mon alay samito
agak unsasawan pililinggis ko
balbalikas kod leleg kon naugip
“inaro dere ka met diyay daiset”

aliingan kon sikani pi-anap inaro
ta sikay maseet ya katungtung ko
anggano anggapoy kakanaan to
wala ni im-imis mon ebatan ira
ya sikatoy pakalkalekan tan dua
no maminsan nibagam “atapis ka”

agkon balot sisinti-en so ibagam
ta diyad sisiak so lurey mo raman
masilib ka met ta agmo susubraan
iyan mo ed tambib na kaunungan
makarason; pusok sikay nanpiyaan
balet natan inaro agko antay nilam

sikay marlang ya bitwen

manonton dalan

abiglaak nen manapitay pagew ta
singa walay kimmibual ya sira
ed lusukon manparparok uni-indan
mii-iliw er petang na lakapan
agmo siguro naimano ta akakirem ka
ya mi-aabagey ed liket na kugip
ya undedelet ed nantupag mon kirep

intuwek kon indepel so bibil ko
ed lambot na tenger mon mansamyo
inkaterak na linak na mansirunget
inkaliknak na gamet mon mangeget
nagngel koray balikas mon mauyamo
tinalikepkepan toy maaron mundo
ateleka bekta, nalmok so bibil mo

nababalkot so bilunget na kareenan
dibali natetemek ya bulong ed dapan
tan say suyot na genggeng ya narasan
pulitiputan toy sibaweng ya akasibang
iketket toy ngipen ton makdem nen palang
balet inaro agkon balot iran im-imanuen
ta sikay pinabpablin marlang ya bitewen

041209A susuyurey beneg ko

manonton dalan

akinet agko nalikiran iray linggis mo
singa misteryoson petang ya amamayo
ya no agmoak im-imnuen et an-anapen ko
saray imis moy masarag lan panbilay ko
say pilpilalek ko balet dere kadiay daiset
tano ikirem ko et lakap moak na malmalet

niman akaplas moy limak singaak asinit
maruksa kan lawas agmo anggan pinirit
no inanguban moak er saman et milaak
er daluyon ya mantatabugis ya nasaspak
no tampalen toy takdang insan unkamayat
manburaburan laklakapen toy aroy linak

diyar maaron labi akugip takan manbukbukor
aakbibiten kay guligon awawey moy agnakaor
mitimiti-ak ya inasinggeran taka, agak makasalita
insalar koy aping kod pagew mo dengdengelen ko
paroparok tan sibesibek ya makapalemek na puso
aliknak maam-amon puyok susuyurey beneg ko

leleg ya akabangon

manonton dalan

kalukas tuyan talukap sikay pi-anap
labi man o agew singa mankuykuyab
mitimitin bibil labay to migantil lawas
kasakbayay maaron liwaway napunas
matalabit nen say kunehon mangibano
anggan aalawatey salsalitan “magano”

no agapuay tungtung ira, ay manando
makapalpalek o makapanangis o anto
parepareho masayaksak so kasumpalan
wala ray imis tan inawa ed kanonotan
no bilang et akasaew guliguley pagew
talusen toy ugip dakela oras ya natakew

angga man untan unsayar er lingwan
unsaip ed nonot walay pakakalekan
idaldalatdat kon uliulien agak unsawa
ta diyar kaote-otelay nonot akakadena
singa natan palbangon ya mareereen
leleg ya akabangon sikay amamayuen

bitewen na mata mi

manonton dalan

nanonotan mo kasi liwaway letakan
ya ap-aplusan toy uman naiyanakan
saray masasanting iran kalangweran
sayaw da et balitad sangkamunduan
saray ilalak iran maligligan sempetan
saray samit na iliw nabekad lingwan

nanonotan mo ni kasi ray bakabakat
ya inantabay na panangaro tan irap
ya no unsaip er nonot, makasungap
patertere’y lua diyad aping unkamayat
untan met ed likeliket na sankabulegan
simmalumpapak tan ag la nasabsabaan

narengel moray es-esaes daray dagem
saray terter na malinlinew iran linaew
saray billit er tagey manpapasirayew
nanlaktipan iran liman sikay sasambaen
maaron bibil sikan sika’y tutungtungen
ta sika may inararon anak ya bitewen

agkon balot alingwanan

agay met lan panabagey er dili
anagasang so matak; walay sili
unsibang araldalem iran tepet
kasiay muling kon unkuraret
ansakit siguroy siplog, imbeneg
arukruksan puson alenleneg

mitimiti-ak labay kon talusan
takilingen koy bulong atapilan
rosas tan samyon naanguban
maka-imisak, dapigas lingwan
kikiyen toy pagew, makasigam
ipanpanonot turay ula-ulam

kinemkemak na kareenan
intangay kod tawen, anonotan
saray esaes mor danganan
leleg na salitay mantaptapilan
saray lurey mo tan sipasipan
wadya agkon balot alingwanan

imis tan gayaga

manonton dalan

no lingayen ko ray bulobulong iran napnaplag
tan sukayan koran sansakey pati saray angkelag
wadman kayon manyudyurong say banuay aninag
saray talsik na pitek ya unkamayat er dapan a melag
tutundasen toy makisir iran dalan diyar kabuasay sinag
wadman kayon narerengel koy boses yon katoy bantag

no unsaip lay bilunget er banuan letakan, maermen
selselan koy lamparan larak na niyog; selselengen
ap-apigeren koy mansulat; saray letra palimlimpeken
ta wala may ilalon wadman kilamet ya banbantagen
ag-abayag sikilay naandipat, bukbukuran kolay dalan
say inkuan da limma kayo kunod aabong na karaklan

dimmepes binmangon iray temel; aminpiga agnabilang
uran ya beyewbeyew ikutep toy salik agkon balot ininda
intikyabak na manok binaliw toy taew siyak so inlutda
tinekmelanak na arin walay pana; manbegsayak kuanda
inakuk ya amina irap tan akipuligesgesanak ed gayaga
maong amoy nansumpalan ko walay imis kon limmesa

agaman untan singa gulis labat er kabueran atandaan
naidamilid muling ko agbalot naisukib er pankaindan

maong ka labat ed una

MANONTON DALAN

singa apaksot so aangesan ko inaro
nagngel kod nanlaktipan mon bibil
ya ibebesngaw mon ikaindan taka
akinet nen karuman marakerakep so
aruan ta; natan abalbaliw, anto ka
pati imis mo pilpiliten mon isiblet

panon ko yan talusan unyan kikipasen
agmo metla ninonot makapasinagem
asingsinger nimet so iseselek na banua
ya iilaluan kon sika et mangiter ligliwa
akin no milakar siyak pantungtungan ta
piyan nauksoy tayan barungan ta aliwa

antam imay balayuboy er sagur na mangga
apaliberay pako. ilang-ilang tan gumamila
amay paneralan tay kumpapey tan andirit
no amay nasapigar taka sikay makatittitit
papalsaan moak gagalaen kan ap-aplusan
manmismisuot ka angad sikay naanguban

hmmm**agko mila ta mankarapas ka
tan walay pakakaruen mon manruksa
ditan kala, maomaong ka labat ed una

agi agak makayurong

MANONTON DALAN

antis umbutay so banuad letakan
manaames kami lad angalakan
tarok miray pastol min amesen
iguran mi baog dan unkukusen
ekalay ampas insan terakteraken
naangub koy dalan ampasaseng

dugaruga naaninaw milay liwawa
aangub-anguban toy linggas na uma
mangalisangew iray dikarikan garana
birbirdi ya tua saray ayep labalabay da
walay awit min palpal ikutep mid pegley
naerasay ayep no say lubir da et antikey

kasumpal to manusilan kamin unsempet
unurong kami; agak unsaew lapur lewet
siguro aray mamasiken maestro day duweg
mandalingirang lay banua wadman mantemeg
aminsan nablos so pastol ko angay balatong
bimmibiret so ebet ko, agi agak makayurong

anggan posti silesilew

MANONTON DALAN

abantag koy bangkag ya naiyanakan
daiset ni akaalagey iran kaabungan
no iyasingger koy matak malinlinew
nanengneng ko anggan posti silesilew
diyad bektan say lugar so paparlasan
amawil iray inbeneg ya agawgawaan

igapok pa ed tulaw; silew na galawan
walay awit min tisa, igusagos er dalan
andukey ya gulis belsayen toy kalsara
insan apag-apagen mi singa bibingka
apatiran pabarbaribar iran marmarka
sampiruan ya galaw sikatoy inkuanda

labalabay kon narengel iray titit marikit
no nasingkat ko singa siwsiw ya napipildit
atay aminsan asagur so kamison apultot
so garter, akilad limak ya agurabis manotot
abainganak ta manakis insilan toak na bakbak
diyar leleg to so apatirak apasubsub so lupak

wala met may amutan diyad bilbilunget
diman kamid kaabyangan ya mapalepalet
manlalakapan kami saray bibii mankarekkek
no walay mandalem siguradon walay napepek
balet no siyak unamot untuloy lad kasesempet
agdak naanap tabunan koy laman koy kulkulnet

inaro sikatoy pirpirawaten

MANONTON DALAN

no unsibang kar nonot ko inaro
ikirem koy matak insan ideen ko
ta agko labay walay nalibangan ko
no makaimisak tampol kon iyamot
kunwarin akasikagamak o manokok
tano makaakisak et agda naim-imano

talagan maruksa kan lawas, agmo anta
pinunuyan mon papasensiyaan ta ka
labalabay ko met ta napnapno kay drama
wala ray paabet mon mangiter ligligliwa
kasumpal balet ag-unsaew unkaro ka
paakisen moak ibalibag moy puwerta

amay aminsan makalekak lalaingen
agaygay, agka akaalis walay apigeren
nagmawilak ya katulong mon sanagew
makakaimis kan iyalan takay inumen
tinawag moak ni maruyo ran ngaran
anggar natan sikatoy pirpirawaten

pusom so unsibeg

MANONTON DALAN

diyar or-orakad mulmuling
palesaen toy ankekelanting
ya apalabas lan sansanting
wala may mangiter na elek
wala may makaputi bubuek
nayarin arumay linglingas
piyan nipaliing toy buenas

leleg toyan bektan umbabatik
warya kad nonot kon nauugip
itdan takay anges mon gayaga
piyan walay imis mon akatarya
pamuknelen koy api-aping mo
pasimsimpiten koy bibibil mo
say pagew mo pabalegey daiset
kasakbayay pusom so unsibeg

ginagalak ya inkaindan iray matam
tano nalinggis ko nalnes so tamitam
talikebkeban to ak nalemay so laman
anguban moak piyan unkilasak er satan
inaro agka komon manpungit mankarag
isaliwan takay pabalingit anggan melag
maayamuom pasayaksaken toray pegdat

pusok so man-ay-ay

MANONTON DALAN

inaro aliling koy sebong mannangis
er inkasiyan kor mayumis moran imis
say pakakailiw ko nonot koy nakewkew
guligolen toy palpalnay pagepagew
akinet bigla kan anguman manpungit
agtakamet rinukruksa o kinirkirwit

ibagam par siyak no antoy nankulangan
no antoy sengeg tan ulnos na barongan
ya in-inuten toak ya tatamingey laman
lapur inkaandi’y ganganak ya mangan
pati ime-imeng na dukulan atentenyeg
ya datiratin ubong tan papasay sibsibeg

maya kapa inaro, inaro dengel moak
dengel moy tagtagleey na saray luluwak
ta diyar kaotela-otelay linlinawak warman
kan mangi-imatoy ermen tan gayagan
nababalkot na panduaruan makalemay
ansakita amin pati pusok so man-ay-ay

*** parad saramay kaayam kod golf
niman ya taga dagupan ed kagletay uran.
mananam may mongolian aro.

nanonotan moak ni kasi

MANONTON DALAN

panon kon lingwanan
iray samit daray esaes
mon katekep toy petang
na malet moran mesmes

panon kon punasen
iray samit na imis mon
naikutep ed nengneng
ya amamayoy pagew

panon kon ikaindan
iray malugon bektan
nilapir na linak na labi
ya natatawayan konid
sayan maaron bibil

no saraya et unlesa
makaterter iray luak
makasempet ed palsa
salurey babawin atilak

bang mas maimpis lay ilalo
say apalabas katoy amamayo
wala met ni unsabin nabuas
pinonot, pi-alagar takan lawas

ugip kod labin mapalpalna

MANONTON DALAN

no lingayen koray bakat kod taew
unsibang iray pukapukal er pagew
agew koran amantilasay tagtagleey
diyad bilunget matak so manimemey
wala may ibabandok so ngaran mon
abageyen moak balet inakmoy daluyon
akasungapak binassiyok na nengneng
inalagar koy likliknak ya unlaineng

atangay koy elek daray mantiktikyab
manpanta ra say payak day mankuyab
agda ibebeleng so aw-awey dan lawas
mananap labat na pamaksoy era-eras
aliwan kaparak dakela liman unkerew
agda natatalusan nepeg naitday linew

pawilen ko lamet so bektan pakakailiw
kaparak imay mananap na inan siwsiw
no basaen koray suket kon pawit mo ra
napnuan nak na sayaksak ya aaruen taka
maime-imeng so ugip kod labin mapalpalna
amamayok iray imis mo ran maligliga

suket- email

salming na puso

MANONTON DALAN

no lilinggisen koray
malugon matam
agko napukpukay
imesmes iray limam
ta labay kon miulop
ed samit na kugip mon
mantiktikyab

no ikirem mo inaro
singa napaksot so anges ko
sosopsopey akatalimukor mo
ran kirep; makatuwekak
anggad naliknak iray
lambot na bibil mon
salming na puso

say pusok pitawag to kan naynay

MANONTON DALAN

diyad kalmay pagew amamayuen
koray apalabas iran maaron bekta
taruktaruk toy manterter kon lua
ipapawit kod dagem iray ula-ula
samsampatey mamabukig ya siplog
paunlad sipanan tan malimer ya alog

mankalkalinatey iray parok na pusok
apespes so linawak pasakiten toy ulok
nanonotan koray malugon moran bilin
diyar liknaan ko naidamilin amin-amin
ya akasempet ed inkaindan iran ilalo
ya anggar natan apanu ni panangaro

ipulisay kola komon iray kugip ko
ya unsabin sika ni kadungok ed ugto
balet wala ray lupan mangipapawil
guligolen toray liknak; talagan sutil
no ikirem koray matak, ay mas lalo
naangub koy samit na pabalingit mo

pinulyanan kolan untan so batik to
unimisak labat no unla kad nonot ko
balet agko napukpukay makaakmon
mailiwak ed samit na panangarom
sika so rosas tan uran toyan bilay
say pusok sikay pitawag ton naynay

aminsan liwaway kabuasan

MANONTON DALAN

atakiling koy banuan manngirngiriyet
paleletaken toray bingkul ya immawet
say siplog na dageragem singa yubuyob
ampetapetang ya mansasbid suposupok
ya ayuyang daray atap iran manomanok
saray bulobulong manbaybayes nalelenes
aliling toy pusok ya abayag lan naiimanes

gala inaro, gala tambal moy paepaer ko
abagey mora yan mannangis iran liknaan
ta sikansikay panpirpirawatan toyan puso
no bilang ta sikay akalingwan, lingayen
ray malmalet ya aruan mo ran nanlapuan
ta wala ni parok daray ilalon inkaindan
ya aminsan liwaway abeten ya kabuasan

itikyab dan pilit

MANONTON DALAN

terter na linaew er kabuasan
unagused bulong punpunasan
dabok ya intiktikyab na dagem
ya asabiyay bilunget na ngarem
palabasen toy santing abangunan
pati busel na dosas mapasirayew
dagupey pukyutan tan kumpapey
panliketan day delo tan balingit
tarok day bini itikyab dan pilit

diyad mapaleper ya tiktikyab da
isibbuak day panmunatay bunga
saray masinsinte yoran ele-eleng
pakaskasin mansinglot, apanateng
manluwa ray matamata, mabeleng
balet inaro agmo ipapalsad siyak
ya maney-ey so liknam lapur siyak
nayarin akuen ko no lakapen moak
itepel koni karukarut mon unsugat