manonton dalan
abiglaak nen manapitay pagew ta
singa walay kimmibual ya sira
ed lusukon manparparok uni-indan
mii-iliw er petang na lakapan
agmo siguro naimano ta akakirem ka
ya mi-aabagey ed liket na kugip
ya undedelet ed nantupag mon kirep
intuwek kon indepel so bibil ko
ed lambot na tenger mon mansamyo
inkaterak na linak na mansirunget
inkaliknak na gamet mon mangeget
nagngel koray balikas mon mauyamo
tinalikepkepan toy maaron mundo
ateleka bekta, nalmok so bibil mo
nababalkot so bilunget na kareenan
dibali natetemek ya bulong ed dapan
tan say suyot na genggeng ya narasan
pulitiputan toy sibaweng ya akasibang
iketket toy ngipen ton makdem nen palang
balet inaro agkon balot iran im-imanuen
ta sikay pinabpablin marlang ya bitewen
Wednesday, May 13, 2009
Subscribe to:
Post Comments (Atom)
No comments:
Post a Comment