manonton dalan
no lingayen ko ray bulobulong iran napnaplag
tan sukayan koran sansakey pati saray angkelag
wadman kayon manyudyurong say banuay aninag
saray talsik na pitek ya unkamayat er dapan a melag
tutundasen toy makisir iran dalan diyar kabuasay sinag
wadman kayon narerengel koy boses yon katoy bantag
no unsaip lay bilunget er banuan letakan, maermen
selselan koy lamparan larak na niyog; selselengen
ap-apigeren koy mansulat; saray letra palimlimpeken
ta wala may ilalon wadman kilamet ya banbantagen
ag-abayag sikilay naandipat, bukbukuran kolay dalan
say inkuan da limma kayo kunod aabong na karaklan
dimmepes binmangon iray temel; aminpiga agnabilang
uran ya beyewbeyew ikutep toy salik agkon balot ininda
intikyabak na manok binaliw toy taew siyak so inlutda
tinekmelanak na arin walay pana; manbegsayak kuanda
inakuk ya amina irap tan akipuligesgesanak ed gayaga
maong amoy nansumpalan ko walay imis kon limmesa
agaman untan singa gulis labat er kabueran atandaan
naidamilid muling ko agbalot naisukib er pankaindan
Monday, March 9, 2009
Subscribe to:
Post Comments (Atom)
No comments:
Post a Comment