basta walay digo

MANONTON DALAN

akilamay so betel ed bilunget
sinupok so laman tuloy kegkeg
sinibok koy limak; eleng apureg
pati layag tan gamegamet immawet
marakep et amay digon ampetang
anggan inlambong ya taba o taglang

amay walay sili ton labuyon ilupen
ya say matam labay ton papultaken
nalingwanan moy betel tarok panginaen
no nasingkat moy laman ay! ngatngaten
pasensiya kila balet ya anggapoy ngipen
agkayo une-elek ta nasurob kayo'y sibaweng

imis ya manando

MANONTON DALAN

asabian takan mansibisbek ed pireg
labay ko komon ya ibano taka, balet
atalikebkebanak na baing ya masyado
linampasan takan singa agtaka naimano
alinggis koy aping mon tinumbok toak
intultuloy koy manakar nababainganak

asabik hardin na hapon agak makairong
wadmanak babantayan koy alolong
bibilangen koy manterter ya danum
pan-al-alagaran koy igapu na eskuela
katekep lay panaral kon mankwenta
tan ipatikyab koy nonot kon maliga

arawi lay asabi na kugip kon abini
angiter na imis kon anggapoy alabi
apultot na makmaksil ya batingting
amawilak lamet ed dalin ya aliing
aya lamay klasik ya walay takot ko
ta say salitak ed singa pikeweten to

sayan maestrak so agaylay santing
labay toy balikas, salitak mantakning
aliwan siak labat wala niray anaw-awet
singa samay binayon kahoy ya ansakket
wala met singa da ikakansiyon, marakep
balet no nasabi damay katagyan, unswek

naynay kon pilien imay yurungan ed beneg
asingger ed bintana petek na kiyew ya baleg
dakedakel ya nababantayan kon tikyatikyab
wala ray loko napnoy biskeg labay day unkalab
uputen koy panaon diman asimpok so imanok
agdak met sisitaen, ta walaak er suysuyok

sagpaminsan unlingaw kan walay anapen
antak, aliwan siak so rason mon pawilpawilen
nanenengneng koray uyamo daray matam
ya diyad biglan takiling singa mankidyam
aalagaren kon sikay unimis odino unkindat
masiblet ka pinulyanan moak ya kimmelat


sakey ya agew kapot ni puerta
wadman ka lamet balet maliga
alinggis ko lamet iray matamatam
aputer so anges tarok toy tamitam
diyar lingwan aketelak er abay mo
nen unsabi iray kaeskuelaan tayo
walay lokloko, itutulaktulak toak
biglakan nansalita inyagel moak

lapur saman bilay koy mainawa
no walay manloko lingayen taka
natan anonotan ko atilakoy matak
no ikerem ko unlesa kad kirkirlap
natan apasikmatan koy ngaran mo
naibesngaw; “iner so kawalan mo
manpasalamatak ta alingwanan ko
unaan kan angiyagel ed sayan too

busel

MANONTON DALAN

amesmesan kon malmalet so inuman
naibebesngaw na nakukuramil kon dila
inaro anto kasi, antoy gagawen morya
kasumpalan mon inpanta ray liknaan
mo ya anggan kapigan agmoak pawilan
asakitanak inaro pilit kan ililingwan

immarawiak tan akipalaran ed aruan
angaroy linglingas iran kaparparam
makmakpel so loob kon mangiyula-ula
na liliknaen kon datin iya-amot kora
maples irayay gamet kon mangabagey
lapur napnuak na sibeg tan gayaga

kirem kon binegsay so maruksan daluyon
amin pigan naibong tampol kon timmuon
ta walay busel na ilalon diyar nonot immuli
ya anggaponi taping ya siyak so akalingwan
anggan diyar malinak labin siyak so abalkot
na reey ugip ya amamayuen daray kugkugip

atandaan koniray malugolugon moran angub
aliling to inaro may parlang ya walay yubuyob
saray mapasirayew moran imis ed kabuasan
ya sikatoy liwawa tan basbas kon sanpegtaw
aray mataltalabit tan mail-ilail moran balbalikas
wadiya nid nonot kon manpukpukal agnapunas

agko labay ya bangunan

MANONTON DALAN

e! palayupoy tarok moy linak na luyag
bebekaen moy dabuk ya anak na tikag
inkirem koy matak piyan agak napulingan
pinabli agko naimanon wala kad kawalan
balet say ayumuom moet agko nalimatan
dugarugan imulagat ko sikay apakisyapan

tampol pusok so manparparok ta sikay pilalek
laman koy kimmapoy kaulop daray gamegamet
akaangesak na aralem nen duan lima tay nanabet
kabansag na inlesay alimbusabos sikatay asaniban
ya pepesnakay iliw na duaran bibil ya nanpaknaan
o! pinabli, no kugip ya agko labay ya bangunan

sikay pi-anap

MANONTON DALAN

walay sibeg kon limmesa
ya amamayuen toy linawak
aliling toy ayep akapeget
manilalod unsabin kanawnawa
ya kapirit na bektan mareen
ed pagew mon ubong simbeng

no punasen koy kirem; liwawa
ya anapen toy linggas mon raya
makapukpok anges,makamagay teek
idadasal kon nonot koy maktek
ta sayan pusok sikay pi-anap to
sika'y biskeg na bilaya manando