basta walay digo

MANONTON DALAN

akilamay so betel ed bilunget
sinupok so laman tuloy kegkeg
sinibok koy limak; eleng apureg
pati layag tan gamegamet immawet
marakep et amay digon ampetang
anggan inlambong ya taba o taglang

amay walay sili ton labuyon ilupen
ya say matam labay ton papultaken
nalingwanan moy betel tarok panginaen
no nasingkat moy laman ay! ngatngaten
pasensiya kila balet ya anggapoy ngipen
agkayo une-elek ta nasurob kayo'y sibaweng

imis ya manando

MANONTON DALAN

asabian takan mansibisbek ed pireg
labay ko komon ya ibano taka, balet
atalikebkebanak na baing ya masyado
linampasan takan singa agtaka naimano
alinggis koy aping mon tinumbok toak
intultuloy koy manakar nababainganak

asabik hardin na hapon agak makairong
wadmanak babantayan koy alolong
bibilangen koy manterter ya danum
pan-al-alagaran koy igapu na eskuela
katekep lay panaral kon mankwenta
tan ipatikyab koy nonot kon maliga

arawi lay asabi na kugip kon abini
angiter na imis kon anggapoy alabi
apultot na makmaksil ya batingting
amawilak lamet ed dalin ya aliing
aya lamay klasik ya walay takot ko
ta say salitak ed singa pikeweten to

sayan maestrak so agaylay santing
labay toy balikas, salitak mantakning
aliwan siak labat wala niray anaw-awet
singa samay binayon kahoy ya ansakket
wala met singa da ikakansiyon, marakep
balet no nasabi damay katagyan, unswek

naynay kon pilien imay yurungan ed beneg
asingger ed bintana petek na kiyew ya baleg
dakedakel ya nababantayan kon tikyatikyab
wala ray loko napnoy biskeg labay day unkalab
uputen koy panaon diman asimpok so imanok
agdak met sisitaen, ta walaak er suysuyok

sagpaminsan unlingaw kan walay anapen
antak, aliwan siak so rason mon pawilpawilen
nanenengneng koray uyamo daray matam
ya diyad biglan takiling singa mankidyam
aalagaren kon sikay unimis odino unkindat
masiblet ka pinulyanan moak ya kimmelat


sakey ya agew kapot ni puerta
wadman ka lamet balet maliga
alinggis ko lamet iray matamatam
aputer so anges tarok toy tamitam
diyar lingwan aketelak er abay mo
nen unsabi iray kaeskuelaan tayo
walay lokloko, itutulaktulak toak
biglakan nansalita inyagel moak

lapur saman bilay koy mainawa
no walay manloko lingayen taka
natan anonotan ko atilakoy matak
no ikerem ko unlesa kad kirkirlap
natan apasikmatan koy ngaran mo
naibesngaw; “iner so kawalan mo
manpasalamatak ta alingwanan ko
unaan kan angiyagel ed sayan too

busel

MANONTON DALAN

amesmesan kon malmalet so inuman
naibebesngaw na nakukuramil kon dila
inaro anto kasi, antoy gagawen morya
kasumpalan mon inpanta ray liknaan
mo ya anggan kapigan agmoak pawilan
asakitanak inaro pilit kan ililingwan

immarawiak tan akipalaran ed aruan
angaroy linglingas iran kaparparam
makmakpel so loob kon mangiyula-ula
na liliknaen kon datin iya-amot kora
maples irayay gamet kon mangabagey
lapur napnuak na sibeg tan gayaga

kirem kon binegsay so maruksan daluyon
amin pigan naibong tampol kon timmuon
ta walay busel na ilalon diyar nonot immuli
ya anggaponi taping ya siyak so akalingwan
anggan diyar malinak labin siyak so abalkot
na reey ugip ya amamayuen daray kugkugip

atandaan koniray malugolugon moran angub
aliling to inaro may parlang ya walay yubuyob
saray mapasirayew moran imis ed kabuasan
ya sikatoy liwawa tan basbas kon sanpegtaw
aray mataltalabit tan mail-ilail moran balbalikas
wadiya nid nonot kon manpukpukal agnapunas

agko labay ya bangunan

MANONTON DALAN

e! palayupoy tarok moy linak na luyag
bebekaen moy dabuk ya anak na tikag
inkirem koy matak piyan agak napulingan
pinabli agko naimanon wala kad kawalan
balet say ayumuom moet agko nalimatan
dugarugan imulagat ko sikay apakisyapan

tampol pusok so manparparok ta sikay pilalek
laman koy kimmapoy kaulop daray gamegamet
akaangesak na aralem nen duan lima tay nanabet
kabansag na inlesay alimbusabos sikatay asaniban
ya pepesnakay iliw na duaran bibil ya nanpaknaan
o! pinabli, no kugip ya agko labay ya bangunan

sikay pi-anap

MANONTON DALAN

walay sibeg kon limmesa
ya amamayuen toy linawak
aliling toy ayep akapeget
manilalod unsabin kanawnawa
ya kapirit na bektan mareen
ed pagew mon ubong simbeng

no punasen koy kirem; liwawa
ya anapen toy linggas mon raya
makapukpok anges,makamagay teek
idadasal kon nonot koy maktek
ta sayan pusok sikay pi-anap to
sika'y biskeg na bilaya manando

basta walay digo

MANONTON DALAN

kimmigtel lay angalakan
saray sanga manuy-uy-uyan
naplag laran amina bulong
baog kimmekebet singa oong
ansakit so siplog na dagem
anggapoy tundan sanngarem

asewek ed otel na kakiyewan
us-usdungay lurem napnoy uran
manalagar na sustosuston petang
insan to ipelag ton manlalbang
leleg ya manalagar manpulpog kami
kanding; pangawaay digon ilupen mi

abagey moak

diyad kakuyepay silew
say matam so marlang
ipaparungtal toy lupak
ya abalkot na imis
agkan balot kimmerem
nen siplogen kay dagem

alikas koy petang mo
ya simmapigar ed lusoko
kimmupit iray taklay ko
mareen ya amina manliber
andibali terter na linaew
tan say puok ya unkekerew

agmoak ipulesay

MANONTON DALAN

akinet main-inaumay er sika
ya paakisen moak tan untan
met no labay mon paeleken
antam, inaro abayag ya tepel
kon aakbibiten, inangnangis
er palnay dagem, idadalem
kod bilunget na saray lurem
balet agmoak im-imanuen

anggan linggis moak labat
ta imanum so linggas kon
pinanpuyatan kon sanlabi
agay lay ruksam, mangasi
labay mo sirin ya nabalang
ko’y nonot ko lapur sika
ibanbandok so nanlapuan ta
agka masiblet dengel ka

ipulisay moy paga tan pasnok
ta say kerew ko et daiset, sinok
agmo komon geteley anges ko
ta sikay lirion an-anapen to
no bilang insukib moak lad
lingwan, ay! iyalageyan mo,
ibagam aliwan siyak so lilikiran
ta say liknaan koy nasasakitan

busel na ilalod nonot

MANONTON DALAN

amesmesan kon malmalet so inuman
naibebesngaw na nakukuramil kon dila
inaro anto kasi, antoy gagawen mor ya
kasumpalan mon inpantara ray liknaan
mo ya anggan kapigan agmoak pawilan
asakitanak inaro, pilit takan ililingwan

immarawiak tan akipalaran ed aruan
angaroy linglingas iran kaparparam
makmakpel so loob kon mangiyula
na liliknaen kon datin iya-amot kora
maples irayay gamet kon mangabagey
lapur napnuak na sibeg tan gayaga ey

kirem kon binegsay so maruksan daluyon
amin pigan naibong tampol kon timmuon
ta walay busel na ilalon diyar nonot immuli
ya anggaponi taping ya siyak so akalingwan
anggan diyar malinak labin siyak so abalkot
na reey ugip ya amamayuen daray kugkugip

atandaan koniray malugolugon moran angub
aliling to inaro may parlang ya walay yubuyob
saray mapasirayew moran imis er kabuasan
ya sikatoy liwawa tan basbas kon sanpegtaw
aray mataltalabit tan mail-ilail moran balbalikas
wadiya nid nonot kon manpukpukal agnapunas

IMIS KON AGNABALES

MANONTON DALAN

leleg na ibubutay na letakan
tutuntonen koy linat na genggeng
ya apinpinat ya singa peteng
wadman ya akakukot ed bulong
ya saray mata toy mankidkidyam
aasigtaen toak; singa panangan

ginetel ko; inpaseleng kod agew
agtoak inimano anggapoy kebyew
linukasan koy kahoy gurabis
inpasupok kod ed sipin mailet
"ugip ka" inkuan kon inyesaes
inkalesay imis kon agnabales

pusok so manparparok

abugak so linak na tungtungan
nen walay kimmiriring, biglaan
inmalis kan ag balot amatanir
inkalesa na busel na labilabir
tan angkekelanting iran elek
susutilen daak "singaak telek"

kunwari inaro agko inbelbeleng
matak walad dalin agmakaseleng
diyad pagew ko balet agmakareen
singa sapsapigerey bulong na ermen
mabetbet inaro so sungap koy dagem
aabageyen koy dilik, makapasinagem

kamamantaan alinggis kon nitan kala
walay bitbita supot,karga agko anta
say imis mo singa dosas ed kabuasan
mabusbuskag, no silew manlangalang
sineleng moray matak kalaktip lakap
alikas koy pusok manparparok, mantipak

akinet agmo imbagad siyak

manonton dalan
(akatandagak ed bintanan
iibegan koy santing daray
kaliberliber nen limmesayan
anlong)

liwawad bukig unkakamayat
pinabusel toy ligligad luyag
kansiyon iran masaysayaksak
iiliwen toy maar-aron lakap
mitimiti ran bibil, abitlabitlan
ngaran, akalukip er pankaindan
sulming er pagew manlangalang

nantupag ya dakulap nalmo toy aping
sinuroy toy buek, insalar tod dingding
emel ya pansibsibek amalsay ermen
paterter lay luwan abayag lan benben
“agaylay ruksam inaro” naiyebkas
tan andukey iran tungtung, marmarlas
pinaksot na katok er puwertan lukas
batika immabet, amina erme’y apunas

sikay limer

manonton dalan

limer er sika, sikay tangkay
toyan maletletey ya bilay
limer er sika, sikay ilalo
toyan maar-aron puso
limer er sika
inaro taka

diyar panakar na agew
limer kan akalaktip er pagew
ya mipaparukan, migagantil
napnuay liga lawasa sutil
balet masarag lay im-imis
mon punasen toy nangnangis

sikay inarok
manandod pusok
simsimpitan kon iya-amot
ta agkon balot labaya napultot
sikay limer ya tangkay toyan bilay
tan sikay limer ya ilalo toyan puso

pusok; sikay nanpiyaan

manonton dalan

walay kugip kon masansanting
naliliknak ed maaron aping
samay im-imis mon alay samito
agak unsasawan pililinggis ko
balbalikas kod leleg kon naugip
“inaro dere ka met diyay daiset”

aliingan kon sikani pi-anap inaro
ta sikay maseet ya katungtung ko
anggano anggapoy kakanaan to
wala ni im-imis mon ebatan ira
ya sikatoy pakalkalekan tan dua
no maminsan nibagam “atapis ka”

agkon balot sisinti-en so ibagam
ta diyad sisiak so lurey mo raman
masilib ka met ta agmo susubraan
iyan mo ed tambib na kaunungan
makarason; pusok sikay nanpiyaan
balet natan inaro agko antay nilam

sikay marlang ya bitwen

manonton dalan

abiglaak nen manapitay pagew ta
singa walay kimmibual ya sira
ed lusukon manparparok uni-indan
mii-iliw er petang na lakapan
agmo siguro naimano ta akakirem ka
ya mi-aabagey ed liket na kugip
ya undedelet ed nantupag mon kirep

intuwek kon indepel so bibil ko
ed lambot na tenger mon mansamyo
inkaterak na linak na mansirunget
inkaliknak na gamet mon mangeget
nagngel koray balikas mon mauyamo
tinalikepkepan toy maaron mundo
ateleka bekta, nalmok so bibil mo

nababalkot so bilunget na kareenan
dibali natetemek ya bulong ed dapan
tan say suyot na genggeng ya narasan
pulitiputan toy sibaweng ya akasibang
iketket toy ngipen ton makdem nen palang
balet inaro agkon balot iran im-imanuen
ta sikay pinabpablin marlang ya bitewen

041209A susuyurey beneg ko

manonton dalan

akinet agko nalikiran iray linggis mo
singa misteryoson petang ya amamayo
ya no agmoak im-imnuen et an-anapen ko
saray imis moy masarag lan panbilay ko
say pilpilalek ko balet dere kadiay daiset
tano ikirem ko et lakap moak na malmalet

niman akaplas moy limak singaak asinit
maruksa kan lawas agmo anggan pinirit
no inanguban moak er saman et milaak
er daluyon ya mantatabugis ya nasaspak
no tampalen toy takdang insan unkamayat
manburaburan laklakapen toy aroy linak

diyar maaron labi akugip takan manbukbukor
aakbibiten kay guligon awawey moy agnakaor
mitimiti-ak ya inasinggeran taka, agak makasalita
insalar koy aping kod pagew mo dengdengelen ko
paroparok tan sibesibek ya makapalemek na puso
aliknak maam-amon puyok susuyurey beneg ko

leleg ya akabangon

manonton dalan

kalukas tuyan talukap sikay pi-anap
labi man o agew singa mankuykuyab
mitimitin bibil labay to migantil lawas
kasakbayay maaron liwaway napunas
matalabit nen say kunehon mangibano
anggan aalawatey salsalitan “magano”

no agapuay tungtung ira, ay manando
makapalpalek o makapanangis o anto
parepareho masayaksak so kasumpalan
wala ray imis tan inawa ed kanonotan
no bilang et akasaew guliguley pagew
talusen toy ugip dakela oras ya natakew

angga man untan unsayar er lingwan
unsaip ed nonot walay pakakalekan
idaldalatdat kon uliulien agak unsawa
ta diyar kaote-otelay nonot akakadena
singa natan palbangon ya mareereen
leleg ya akabangon sikay amamayuen

bitewen na mata mi

manonton dalan

nanonotan mo kasi liwaway letakan
ya ap-aplusan toy uman naiyanakan
saray masasanting iran kalangweran
sayaw da et balitad sangkamunduan
saray ilalak iran maligligan sempetan
saray samit na iliw nabekad lingwan

nanonotan mo ni kasi ray bakabakat
ya inantabay na panangaro tan irap
ya no unsaip er nonot, makasungap
patertere’y lua diyad aping unkamayat
untan met ed likeliket na sankabulegan
simmalumpapak tan ag la nasabsabaan

narengel moray es-esaes daray dagem
saray terter na malinlinew iran linaew
saray billit er tagey manpapasirayew
nanlaktipan iran liman sikay sasambaen
maaron bibil sikan sika’y tutungtungen
ta sika may inararon anak ya bitewen

agkon balot alingwanan

agay met lan panabagey er dili
anagasang so matak; walay sili
unsibang araldalem iran tepet
kasiay muling kon unkuraret
ansakit siguroy siplog, imbeneg
arukruksan puson alenleneg

mitimiti-ak labay kon talusan
takilingen koy bulong atapilan
rosas tan samyon naanguban
maka-imisak, dapigas lingwan
kikiyen toy pagew, makasigam
ipanpanonot turay ula-ulam

kinemkemak na kareenan
intangay kod tawen, anonotan
saray esaes mor danganan
leleg na salitay mantaptapilan
saray lurey mo tan sipasipan
wadya agkon balot alingwanan

imis tan gayaga

manonton dalan

no lingayen ko ray bulobulong iran napnaplag
tan sukayan koran sansakey pati saray angkelag
wadman kayon manyudyurong say banuay aninag
saray talsik na pitek ya unkamayat er dapan a melag
tutundasen toy makisir iran dalan diyar kabuasay sinag
wadman kayon narerengel koy boses yon katoy bantag

no unsaip lay bilunget er banuan letakan, maermen
selselan koy lamparan larak na niyog; selselengen
ap-apigeren koy mansulat; saray letra palimlimpeken
ta wala may ilalon wadman kilamet ya banbantagen
ag-abayag sikilay naandipat, bukbukuran kolay dalan
say inkuan da limma kayo kunod aabong na karaklan

dimmepes binmangon iray temel; aminpiga agnabilang
uran ya beyewbeyew ikutep toy salik agkon balot ininda
intikyabak na manok binaliw toy taew siyak so inlutda
tinekmelanak na arin walay pana; manbegsayak kuanda
inakuk ya amina irap tan akipuligesgesanak ed gayaga
maong amoy nansumpalan ko walay imis kon limmesa

agaman untan singa gulis labat er kabueran atandaan
naidamilid muling ko agbalot naisukib er pankaindan